مايو 2003
الحوار التالى هو حوار حقيقي تم على الماسنجر بينى وبين صديقى وأخى الإنترنتى العزيز جداً "البنا"
أضعه كما هو دون أى تعديل .. للذكرى
هشام:
صباح الخير يابو على
إيه النظام؟ محتاجك فى موضوع عاجل جداً جداً جداً |
البنا:
صباح الفل
أؤمرنى |
هشام:
بأسلق كرشة علشان الغذا
ومحتاس بص .. عارف الجلد بتاع الكرشة المنغبش ولونه اسود شوية .. اللى عامل زى سنان فرشة الشعر؟؟؟؟ أرميه والا أخليه؟؟ يعنى بيتاكل والا لأ ؟؟ (مش فاكر) والنبى ترد عليا علطول علشان انا سايبه على النار ولايص |
البنا:
يا نهار اسود
كرشة ، وف أسبانيا أستر يارب سؤال ما كنتش أتوقعه أبداً .. إستنى تحطها في المية السخنة وتيجي رافعها ، وتجرد الناحية الخشنة بسكينة جامد لحد ما تبيض تماماً ، ودي مهمة صعبة . وبعدين الناحية التانية اللي لونها أبيض يجردها بسكين أو معلقة برضه لحد ما تنضف . وبعدين تغسلها كويس بميه وملح ودقيق . وبعدين تقطعها حتت صغيرة وتسقلها ومعاها بصل وفلفل إسود وملح وورق غار ومستكة وحبهان والذي منه يعني ، وياريت شوية روز ماري أو إكليل الجبل علشان السوا . وبعين تاكلها بشوربة وعليها ليمون ، أو تعملها كمونية ، ودي بتبقى عبارة عن تخديعة صلصة عليها كمون كتير تحط فيها الكرشة بعد ما تسلقها ، وعليها قرن شطة أخضر ، وشوية رز أبيض جنبها ، وقول لي عملت إيه . |
هشام:
طب بص
أنا أول ما حأشوفك .. تأكد إنى حأخنقك عشان انت يا إما بتغيظنى .. يا إما بتغيظنى أجيب منين أنا منين ورق غار واكليل الجبل وروز مارى هنا يا جدع انت؟؟؟؟ إحنا حنتنطط على بعض؟؟ بتغظينى يا بنا؟؟؟؟ ماشى .. بس أما أشوفك المهم بص .. أنا إشتريت حمص وناقعه فى الميه من أول إمبارح علشان أعملها بالحمص. أنا فاكر أمى الله يرحمها كانت بتعملهالنا مطبوخة بالصلصة وفيها حمص .. بس مش عارف إزاى. أنا وصلت لمرحلة السلق ,, يعنى سلقتها فى المية ونضفتها بالسكينة وبس الخطوات اللى جاية بعد كده إيه؟؟ وواحدة واحدة على أخوك .. وبلاش إفترا ........... إكليل الجبل؟ طيب |
بعد مرور 15 دقيقة
هشام:
واحد من الجيران إشتكى من الريحة
|
البنا:
معلش كنت بأصلي الظهر
يا هشام بعد ما تتسلق الكرشة كويس (المفروض إنها اتنظفت) تقوم ناشلها من الشوربة (أنا مش مصدق إن الحوار ده بيدور من الجيل الصاعد (وبعدين في حلة تانية تروح حاطط شوية بصل مفروم في الزبدة أو الزيت ، وشوية توم مدقوق (ده الجار ح يقتلك) وممكن قرن فلفل حراق لو حبيت ،وأول ما البصل يصفر هوب تيجي نازل بالطماطم المعصورة وعليها معلقة صلصة ، وتديها ملح وفلفل وكمون زيادة شوية ، وتحط الحمص وتحط الكرشة وتسيبها تكمل سوا . شوف كده وقول لي . |
هشام:
بص يا سيدى
أنا حأقولك اللى حصل بالضبط صلى على النبى من الجزار المغربى .. اشتريتها وخليته يقطعهالى حتت صغيرة الحمص ناقع فى الميه من أول إمبارح حلو؟ حطيت الكرشة (زى ماهى) فى مية مغلية علشان تتسلق وتتنضف بعد ما غليت .. شيلتها من الميه، وشيلت الجلد الأسود لحد ما ابيضت حطيتها تانى فى حلة مع ميه وملح وفلفل اسود وكمون وبصلاية متخرطة فى حلة تانية حطيت زيت زيتون (ماعندناش سمنة) وبصلاية كبيرة مفرومة وفص توم كبير مدقوق وملح وفلفل اسود وكمون لما البصلة إصفرت .. حطيت صلصة وبعدين حطيت الحمص بس الخطوة الجاية إيه سعادتك؟ |
البنا:
جميل شيل الكرشة بعد ما تبقى نص سوا وحطها مع الصلصة والحمص وسيبها تستوي معاهم لحد الآخر ، واعمل شوية رز أبيض جنبهم .
الريحة طلعت على فكرة |
وبعد قليل
هشام:
بركاتك يا شيخنا
تسلم إيدك .. إتفضل معانا يالله تصدق .. أول مرة حأكل كرشة من أكثر من 10 أو 12 سنة ورب العزة إنت كده يابنى هههههههههههه اسمع جاتلى فكرة لذيذة إيه رأيك ننشر مذكراتنا ؟؟؟ هههههههه تيجى ننقل مراسلات الكرشة بيننا وبين بعض للمنتدى؟ ونعمل منها موضوع؟ يالله .. إنقلهم على ما أخلص طبيخ وسمى الموضوع: "مذكرات كرشة" هههههههه |
البنا:
ألف هنا وشفا ..
أنا بس صبعان على مريم اللي عمال تجرب فيها كل المواهب دي على الله تكون الأكلة ظبطت بجد ممكن نحط الموضوع في المنتدى بس أنا خايف من الفضيحة أكد لي ع النتيجة الأول بعد ما تأكل وبعدين ننزلها في المنتدى بالهنا والشفا وأنصحك تعمل جنبها مية دقة ودي عبارة عن مية مع شوية خل وملح وشطة وكمون وطماطم مقطعة (أو مدقوقة أحسن) وشوية بقدونس مفروم ، وتبقى جنب الأكلة وبيسموها عند الحاتي أو عند المسمط بيسموها (ويسكي) وبتتاكل مع الأكلات الدسمة زي الكرشة . |
هشام:
أيوة الويسكى .. عارفه
أنا مدمن ويسكى من بتاع الحاتى وفيه ويسكى تانى عند واحد بتاع فول فى ميدان الجيش/ مية سلطة بس إيه .. نار .. وإسمها ويسكى برضو. بس تعال هنا ... ليه يا بنا كده؟ ليه بتعاملنى المعاملة دى؟ إنت فاكرنى أبيض خالص؟ كل ده عشان ماأعرفش السلوم؟ ولا يعنى علشان ماليش فى الطبيخ يبقى ماأعرفش آكل؟؟ طب اسأل بروف |
البنا:
لأ ده انت طلعت ابن حنت بصحيح في الأكل يا عم هشام
ما دام عرفت مية السلطة بتاعة الحاتي تبقى أوكي على فكرة أنا ماجربتش الراجل بتاع الفول في شارع الجيش بس بأحب حاتي الجيش اللي في أول الميدان أكله جميل جداً واضح إنك انتقمت من بروف في موضوع الأكل أثناء الأجازة بس لما نتقابل أنا وانت في أجازة حأروقك ترويقة مية مية في الأكل وح ننزل دسوق نأكل فسيخ ونروح لأم محمد كفر الزيات وبعدين نحود على بلبع في اسكندرية ونرجع نديها كشري عند أبوطارق في شمبليون ونختمها بالفيشاوي حرام عليكيا هش جريت ريقي |
إتفضلوا معانا
ليست هناك تعليقات:
إرسال تعليق