16/05/2015
ساعات أسأل نفسى بعد ما أقعد معاها وأعزمها على فنجان شاى وسيجارة ..
قوليلى يا نفسى .. تقولى قول يا اتش أؤمر ..
أقول لها؛ هل يا ترى لو كل همومى اللى هما نفسهم هموم ناس كثير مع اختلاف التفاصيل، واللى بقوا كالماء والهواء بالنسبة لى وبالنسبة للناس الكثير ...
تقاطعنى نفسى وهى بتنفخ فى السيجارة: ها، هات من الآخر ..
أقول لها، حاضر ..
شوفى يا نفسى ,, أنا اتعودت عليها!!
نفسى تاخد بق شاى وتقولى: على مين؟؟
أرد أنا: على همومى .. اصحى معايا ,, ولو سابتنى حتوحشنى ويمكن ازعل لو خلصت منها وساعتها حيكون همى انى أرجع لهمومى حبيبتى اللى معاشرها ومعاشرانى وخلاص بقينا واحد، ما أعرفش أعيش من غيرها ..
نفسى طفت السيجارة فى الفنجان من غيظها .. ما أعرفش ليه!! وقالتلى انت نكدى .. واختفت.
ودلوقتى انا قاعد هنا .. بس نفسى مش هنا .. لكن الحمد لله .. همومى هنا.
