فوزى الشجيع

14/5/2014

كان ياما كان، كان فيه قط كبير يدخل كل يوم بالليل المطبخ بعد أهل البيت ما يناموا، يشمشم على الفئران اللى بتسرح فى الضلمة وتسرق الجبنة والعيش. وكان يصطاد فأر كل ليلة ويأكله، فتهرب باقى الفئران للجحور

وفى يوم، بعد ما عدد الفئران نقص كثير بسبب مهارة القط الكبير حارس
 البيت فى اصطيادهم واحد ورا واحد، زعق فأر منهم وكان اسمه فوزى وقال لهم: اخوانى الفئران .. اخوانى الفئران

تجمع الفئران أمامه وهتفوا: قول يا فوزى .. قول يا فوزى

طلع فوزى فوق الثلاجة ليظهر لهم جميعاً وقال بصوت جهورى وبكلمات منمقة منتقاة تهز مشاعرهم: أنا عندى حلم كبير من زمان، وجه الوقت اللى أحققه معاكم. لأن احنا مش ممكن نسكت على القط المفتري ده أكثر من كده .. احنا بننقص كل يوم لأننا بنهرب متفرقين أول ما نشوفه .. هو صحيح كبير وقوى جداً .. لكن لو عملنا خطة محكمة حنقدر ننتصر عليه

فرح الفئران بكلام فوزى، وانهمرت دموعهم من شدة التأثر والفرح وهتفوا فى نفس واحد وبصوت متحشرج: معاك يا فوزى .. معاك يا فوزى

سخن فوزى زيادة، واتمطع أوى وكمل صريخه: نقسم نفسنا مجموعات، مجموعة فوق النملية، ومجموعة فوق الثلاجة، ومجموعة فوق الترابيزة، ومجموعة تحت الترابيزة .. وأول ما يدخل القط الكبير، مجموعة الحوض تشاور، أنط على رقبته أنا ومجموعتى ونعلق فى رقبته جرس. ولو قدرت أخنقه وأخلص منه للأبد يكون أحسن. يعنى فى أسوأ الظروف، حنحس بيه بعد كده وهو داخل علينا المطبخ واحنا بنسرق الجبنة كل يوم، فنهرب قبل ما يأكل منا أى فأر

الفئران نطت لفوق من الفرح والإعجاب بخطة فوزى الرهيبة. قضوا ليلتهم فى جحرهم يغنوا ويرقصوا ويهتفوا لفوزى العبقرى. سهروا للصبح، وتانى يوم بالليل فى الموعد المحدد، انتشروا فى المطبخ فى مجموعات حسب خطة فوزى، كل واحد عرف دوره واستعدوا وانتظروا لحظة دخول القط الكبير الحارس

بعد شوية .. ظهرت رأس القط الكبير من فتحة الباب، كان بيشمشم بشنباته عشان يحدد مكان الفئران. وبدأ يدخل واحدة واحدة. وعلى أقل من مهله وبثقة غريبة .. لحد ما وصل لمنتصف المطبخ، ورفع رأسه تجاه الثلاجة ليحدد فريسته .. وهوبااااااا شاف فوزى وشلته وهما متحفزين، فنظر لهم باستغراب .. لكن نظرته لوحدها أرعبتهم لدرجة انهم صرخوا: لأه لأه ﻷه .. وحدث الهرج والمرج وانتشروا. والقط واقف فى مكانه بثبات وتحفز يتفرج عليهم وهما بيخبطوا فى بعض

وفجأة .. صرخ فوزى: يارجالة .. يا رجالة .. اثبتوا .. أنا حأنط عليه

وراح ناطط فوزى من فوق الثلاجة على رقبة القط. فوقف الفئران فى أماكنهم يتابعوا المنظر، وتحمسوا من جديد .. نطر القط فوزى من فوق ظهره. وحطه تحت مخالبه وعوج راسه ولعابه سال وهو بيتفرج على فريسته الجديدة. أما باقى الفئران، فبعضهم طلع يجرى عالجحر، وبعضهم عملها على روحه واتخشب فى مكانه، وبعضهم وهو بيعيط صرخ: اخنقه يا فوزى .. اخنقه يا فوزى